舊公司有差唔多二百人，印度、韓國、星馬泰同事都有，聯合國咁樣。咁多門派三山五嶽，江湖當然多事！樓上compliance team鬼佬Ed養咗隻非洲陸龜，成隻狗仔咁大隻，間唔時就見佢帶返嚟好似放狗咁，有次個女同事無睇真，以為佢係傢俬坐咗上去嚇到尖叫，Ed嬲到噴煙，不過好似之後無見佢帶龜返公司喇。

公司邊度最多八卦料可以收風？洗手間？Pantry？其實仲有一度係公司嘅printer！自從換咗部新嘅多功能 打印機之後，接駁六個部門，呢部多功能打印機除咗正常影印scan文件之外，最大嘅功能係八到唔同team嘅消息。例如邊條team pitch緊客，跟緊邊單job我都好清楚。好多同事手尾唔好，收工經常會見到有人寫CV搵工、印教會傳單、marcomm班designer做秘撈、邊個放假訂緊酒店，見到嘅古怪嘢真係多到你唔信。

只不過最令我眼火爆嘅，係部打印機jam紙死server出事嘅時候，IT部玩卸膊話唔關佢哋事！好彩部機本身包埋IT 外判服務，打電話去都好快有人應機跟進嘅。但係當我一個人聽住電話，成班等印嘢嘅同事一字排開，好似射罰球咁，就係無人上前幫手！最後個IT外判服務哥哥都算幫得手，隔住個電話都搞得掂。不過真係奉勸各位對公司個admin小薯好啲，因為你唔知自己幾時漏咗重要機密喺printer度，全靠小薯好心幫你放埋一邊！